Ultime modification: le 4 de april 2004 - Traduction in Interlingua: le 10 de april 2004

Nota: Cari D. Burstein ha scribite iste pagina pro exprimer le sentimento detra le campania "Visualisabile con omne navigator". Si tu esseva referite a iste pagina per un sito web que porta le logotypo o texto "Viewable With Any Browser", il significa que le autor del sito es de accordo con le campania e participa in le effortio a discoragiar le designo del web pro navigatores specific. Lege infra plus informationes super le thema, e considera participar.

"Omne persona qui impone un etiquetta 'iste pagina es optimisate pro Navigator X' in un pagina web sembla appeter le mal vetule dies, ante le Web, quando on habeva multo pauc possibilitates de leger un documento scribite in un altere computator, un altere processator de textos, o un altere rete."
  -- Tim Berners-Lee in Technology Review, julio 1996

Si tu ha venite a iste pagina, tu es probabilemente curiose super le logotypo "Viewable With Any Browser" in illo. Ecce mi explication. Io es multo infelice con le tendentia actual verso sitos web designate solmente pro navigatores specific que ignora alteres. Es multo enoiose a me visitar un sito web e trovar que on me ha rejectate usque io retorna con Netscape o Internet Explorer. Es equalmente enoiose visitar sitos web que permitte omne navigatores, ma que depende intensivemente de elementos solmente visualisabile in alicun navigatores popular, o que non se visualisa in navigatores textual.

Io desira reverter iste tendentia. Io sape que io non pote cambiar le web sol, ma omne parve effortio conta; ecce mi voto pro un Tela Mundial independente de platteforma e non specific al navigator. Assi, io ha exponite le button "Viewable With Any Browser" pro sublinear que io tenta crear mi sitos web de modo visualisabile in tote le navigatores, toto functionalmente. Alicun paginas pote haber un aspecto plus attractive in alicun navigatores que in alteres, ma totes debe esser legibile in omne navigator. Io tenta usar le etiquettas specific a certe navigatores solmente in manieras appropriate, e solmente si il existe un bon ration pro le uso de illos, e in le casos in que io ha usate etiquettas visualisabile in solmente alicun navigatores, tales como mappas de imagines, quadros, Java, etc., io ha extendite mi optime effortios a utilisar le optiones de 'degradabilitate gratiose' disponibile in HTML o a fornir alternativas pro navigatores que non pote usar iste fu nctionalitate. Per favor face saper me lo si tu incontra alique in mi paginas web que non functiona in tu navigator (sia specific quanto al navigator que tu usa e a lo que non functionava) e io tentara reparar lo.

Io invita omnes qui vole participar in iste effortio a copiar un del multe graphicos create per le participantes in le campania, que es disponibile in le pagina Any Browser Graphics. Si tu vole crear altere graphicos pro le campania, per favor face lo! (e face saper me lo si io pote publicar ille graphico pro le uso per alteres.) Il esserea preferibile a me si tu ligava le graphico a iste pagina assi que le publico pote informar se super le campania, o creava tu proprie pagina super iste campania, ma si tu non vole facer lo, il non es un problema a me.

Ecce un fragmento-exemplo de HTML que tu pote usar (con le modificationes appropriate) si tu vole:

<p><a href="http://www.anybrowser.org/campaign/anybrowser_ia.html"> <img src="path-to-graphic/graphicname" width="graphic-width-in-pixels" height="graphic-height-in-pixels" alt="Visualisabile con omne navigator" /></a></p>

Nota: Selige un del graphicos presentate in le pagina Any Browser Graphics e copia lo al servitor de tu sito web, e modifica le codice infra assi que illo corresponde a tu configuration e al graphico que tu ha seligite. Non liga directemente al graphico in mi servitor si possibile, proque isto allentara le visualisation de tu pagina, accrescera le onere a mi servitor, e si io debe displaciar le file, tu poterea trovar que tu ligamine cessa functionar subitemente.

Si tu prefere non exponer un graphico in tu sito, ma vole totevia facer saper a gente que tu sito es designate a functionar con omne navigator, tu pote inserer solmente un ligamine textual alicubi in tu sito que dice alique como "Visualisabile con tu navigator favorite" o "Optimisate pro omne navigator" (o altere cosa que reflecte le accostamento de tu preferentia). Il esserea bon si tu ligava iste texto a iste pagina o si tu creava tu proprie pagina describente le campania assi que le gente qui vole saper plus super illo pote trovar informationes ulterior, e possibilemente designar lor proprie sitos a esser visualisabile per omnes. Tu pote visitar le pagina Any Browser Graphics pro cercar altere devisas publicitari contribuite per le participantes in le campania.

Il ha duo rationes principal a poner le graphico e/o texto in tu sito si tu designa sitos web que es visualisabile in omne navigator:

  • Facer saper a tu visitatores que tu face un effortio a render tu sito usabile per omnes.
  • Incoragiar altere gente a designar lor sitos a fin que illos sia visualisabile in tote le navigatores.

Io ha create un Guida pro le designo del sitos accessibile que discute problemas concernente le accessibilitate de paginas web e como render tu pagina tanto accessibile como possibile. Isto non es un guida de HTML, ma illo te adjutara a cognoscer le punctos problematic in le accessibilitate de paginas web, e providera avisos super como solver los. Sia secur a consultar equalmente le sitos listate in le section de ligamines pro informationes additional. In ultra, tu pote discuter le problemas del accessibilitate in le foro Any Browser.

Si tu incontra sitos que non es accessibile e tu vole incoragiar lor autores a render los visualisabile per omne navigator, il es un bon idea inviar les un message. Il ha alicun letteras-exemplos in iste sito.

Io spera que tu participara in le effortio a discoragiar le designo web specific al navigator e adjutara in proteger le libertate del selection pro tote le usatores del web.

Face saper me lo si tu ha questiones, commentos, o suggestiones.

Traduction in Interlingua, latino moderne international e simplificate: Martijn Dekker